First of all, I would like to thank DPWH Secretary Vince Dizon for his commitment to include the Davao City Flood Masterplan in the proposed 2027 national budget.

Kung matuman ni, maayo kaayo. Dili lang para sa Dabawenyo, kundi para sa umaabot nga mga henerasyon nga dili na kinahanglan manglangoy kada kusog ang ulan.

Pero, Sec. Vince, pasayloa ko kung medyo lisod na kaayo mi motuo dayon sa mga saad gikan sa national government. Daghan na kaayong "coming soon" nga hangtod karon, loading gihapon. Ang uban, murag teleserye—daghan ug trailer, walay ending.

Mao nga hinaut unta nga dili ni mahimong usa na pud ka press release nga kusog kaayo sa camera pero mawala ra human sa headlines.

Ang maayong balita para nimo, Sec. Vince, kay dili na kinahanglan mangita pa kag project monitor. Libre ra. Ang tibuok Davao City na ang imong monitoring team.

Ug ayaw kalimti ang imong usa pa ka saad—ang pagpataas ug duha ka metros sa dike sa Talomo River.

Kabalo ka unsay kalahian sa Dabawenyo? Dili lang mi maayo muhinumdom. Maayo pud mi mosingil ug saad.

So gikan karon, every hour among tan-awon kung asa na ang dike. Basin gani adunay mag-post ug "Talomo Dike Hourly Update" nga mas daghan pa ug viewers kaysa ubang vloggers.

Ayaw kabalaka. Dili ni pressure. Public accountability lang ni.

Kay ang gusto ra man sa mga Dabawenyo simple ra kaayo. Dili mi nangayo ug impossible. Dili mi nangayo ug magic.

Ang among gipangayo mao ang inyong gisaad.

Kung naa nay budget, ipagawas. Kung naa nay plano, sugdi. Kung naa nay commitment, tumanon.

Kay sa Davao, ang baha dili madala ug press conference. Ug ang saad dili makapugong sa tubig. Trabaho ra gyud.

Again, thank you, Sec. Vince. We welcome your commitment, and we sincerely hope this becomes one of those rare occasions when a promise from Manila actually reaches Davao.